Diesel Price : త్వరలో డీజిల్ మంట.. పెరగనున్న నిత్యావసరాల ధరలు.. సామాన్యుడి జేబుకు మళ్లీ చిల్లు

Diesel Price : అంతర్జాతీయ మార్కెట్‌లో ముడి చమురు ధరలు పెరుగుతుండటంతో భారత్‌లో రవాణా, లాజిస్టిక్స్ రంగం తీవ్ర ఆందోళనలో ఉంది. ఇప్పటికే పశ్చిమ ఆసియాలో నెలకొన్న ఉద్రిక్తతల వల్ల చమురు సరఫరాపై నీలినీడలు కమ్ముకున్నాయి. దేశీయంగా డీజిల్ ధరలు పెరిగితే, ట్రక్కుల నిర్వహణ ఖర్చు భారమై, చివరికి ఆ భారం సామాన్య వినియోగదారుడిపై పడనుంది. రవాణా చార్జీలు పెరిగితే కూరగాయల నుంచి నిత్యావసర వస్తువుల వరకు అన్నింటి ధరలు ఆకాశాన్ని తాకడం ఖాయంగా కనిపిస్తోంది.

ప్రతి 5 రూపాయల పెరుగుదలకు.. 2.8 శాతం భారం

క్రిసిల్ ఇంటెలిజెన్స్ నివేదిక ప్రకారం, డీజిల్ ధర లీటరుకు 5 రూపాయలు పెరిగితే, ట్రాన్స్‌పోర్టర్లు తమ లాభాలను కాపాడుకోవడానికి రవాణా చార్జీలను కనీసం 2.5% నుంచి 2.8% వరకు పెంచాల్సి ఉంటుంది. ప్రస్తుతం రవాణా రంగం ఇప్పటికే అనేక ఇబ్బందుల్లో ఉందని, ఇంధన ధరల పెరుగుదల గొడ్డలి పెట్టుగా మారుతుందని నిపుణులు హెచ్చరిస్తున్నారు. చమురు కంపెనీలు ప్రస్తుతం నష్టాలను భరిస్తున్నప్పటికీ, ధరల పెంపు అనేది ఎంతో కాలం ఆగదని మార్కెట్ వర్గాల అంచనా.

చమురు కంపెనీల భారీ నష్టాలు

అంతర్జాతీయంగా ముడి చమురు ధర బ్యారెల్‌కు 100 డాలర్ల పైనే కొనసాగుతోంది. అయినప్పటికీ ప్రభుత్వ రంగ చమురు కంపెనీలు ధరలను స్థిరంగా ఉంచడం వల్ల ప్రతిరోజూ సుమారు 1,000 కోట్ల రూపాయల నష్టాన్ని చవిచూస్తున్నాయి. కేంద్ర పెట్రోలియం శాఖ మంత్రి హర్దీప్ సింగ్ పూరీ సమాచారం ప్రకారం, ఈ త్రైమాసికంలో చమురు కంపెనీల మొత్తం నష్టాలు 1.98 లక్షల కోట్లకు చేరుకున్నాయి. ఇండియన్ ఆయిల్, భారత్ పెట్రోలియం వంటి దిగ్గజాలు ఈ నష్టాలను ఎంతకాలం భరిస్తాయన్నది ఇప్పుడు ప్రశ్నార్థకంగా మారింది.

చిన్న ట్రాన్స్‌పోర్టర్ల పరిస్థితి దారుణం

రవాణా ఖర్చులో 50 నుంచి 60 శాతం కేవలం డీజిల్ కోసమే ఖర్చు చేయాల్సి ఉంటుంది. ఒకటి లేదా రెండు ట్రక్కులు నడిపే చిన్న ఆపరేటర్లు ఈ ధరల పెంపును తట్టుకోలేకపోతున్నారు. మార్కెట్‌లో సరుకు రవాణాకు డిమాండ్ తక్కువగా ఉండటం, పోటీ ఎక్కువగా ఉండటంతో పెరిగిన ఖర్చును కస్టమర్ల నుంచి వసూలు చేయడం వారికి కష్టంగా మారింది. పెరిగిన డీజిల్ ఖర్చులో కేవలం 80 శాతం మాత్రమే తాము వసూలు చేయగలుగుతున్నామని, మిగిలిన భారం తమపైనే పడుతోందని ట్రాన్స్‌పోర్టర్లు ఆవేదన వ్యక్తం చేస్తున్నారు.

నెమ్మదించిన సరుకు రవాణా వేగం

ఏప్రిల్ నెలలో పాన్-ఇండియా ఫ్రెయిట్ ఇండెక్స్ గణనీయంగా తగ్గడం రవాణా రంగంలో మందగమనానికి నిదర్శనం. దీనికి తోడు టైర్లు, టోల్ టాక్స్, నిర్వహణ ఖర్చులు, డ్రైవర్ల జీతాలు కూడా పెరగడంతో ట్రాన్స్‌పోర్ట్ రంగం కుదేలవుతోంది. ఫాస్టాగ్ లావాదేవీల్లో తగ్గుదల కూడా ఇదే విషయాన్ని స్పష్టం చేస్తోంది. రవాణా రంగంపై పడే ఈ ఒత్తిడి పరోక్షంగా ద్రవ్యోల్బణాన్ని పెంచి, సామాన్యుడి బడ్జెట్‌ను అస్తవ్యస్తం చేసే అవకాశం ఉందని ఆర్థిక నిపుణులు విశ్లేషిస్తున్నారు.