Crude Oil : సౌదీ అరేబియా చమురు సర్జికల్ స్ట్రైక్.. 26 ఏళ్ల రికార్డు బద్దలు కొడుతూ క్రూడ్ ఆయిల్ ధరలు భారీగా కట్

Crude Oil : అంతర్జాతీయ ఇంధన మార్కెట్లో చమురు ఉత్పత్తి దేశాల మధ్య పోటీ తీవ్రరూపం దాల్చింది. ఈ నేపథ్యంలో ప్రపంచంలోనే అతిపెద్ద చమురు ఉత్పత్తిదారు అయిన సౌదీ అరేబియా ప్రపంచ దేశాలకు భారీ షాక్ ఇస్తూ సంచలన నిర్ణయం తీసుకుంది. రాబోయే ఆగస్టు నెలకు గాను తన ముడిచమురు ధరలను ఏకంగా బ్యారెల్‌కు 11 డాలర్ల మేర తగ్గించింది. గత 26 సంవత్సరాల కాలంలో సౌదీ అరేబియా ఈ స్థాయిలో ఒకేసారి ధరలను తగ్గించడం ఇదే మొదటిసారి. అంతకుముందు జూలై నెలలో కూడా బ్యారెల్‌కు 6 డాలర్ల తగ్గింపును ప్రకటించింది. అరబ్ లైట్ క్రూడ్ పై సౌదీ ఇస్తున్న ఈ భారీ డిస్కౌంట్ వల్ల అంతర్జాతీయంగా చమురు సంక్షోభం చాలా వరకు తగ్గుముఖం పట్టింది. బ్లూమ్‌బెర్గ్ నివేదిక ప్రకారం.. ఆసియా దేశాల కోసం సౌదీ అరేబియా విక్రయించే ముడిచమురు ధర, ఒమన్ లేదా దుబాయ్ సగటు ధరల కంటే 1.50 డాలర్లు తక్కువగా ఉండటం విశేషం.

హోర్ముజ్ జలసంధి పునరుద్ధరణతో మారిన సీన్

పర్షియన్ గల్ఫ్ ప్రాంతంలోని ప్రముఖ చమురు ఉత్పత్తి దేశాలు ప్రస్తుతం తమ ఉత్పత్తిని, ఎగుమతులను యుద్ధ ప్రాతిపదికన పెంచుతున్నాయి. ముఖ్యంగా అంతర్జాతీయ ఉద్రిక్తతల వల్ల మూతపడిన హోర్ముజ్ జలసంధి తిరిగి తెరుచుకోవడంతో సౌదీ అరేబియా తన భారీ ఆయిల్ ట్యాంకర్లను సులభంగా రవాణా చేయగలుగుతోంది. దీంతో సౌదీ ఎగుమతులు యుద్ధానికి ముందు ఉన్న స్థాయికి చేరుకున్నాయి. మరోవైపు, ఈ ప్రాంతాల మధ్య నడిచిన ఘర్షణల సమయంలో OPEC కూటమి నుంచి బయటకు వచ్చేసిన ఐక్య అరబ్ ఎమిరేట్స్ (UAE) కూడా తిరిగి అంతర్జాతీయ మార్కెట్లకు చమురు సరఫరాను పునరుద్ధరించింది. దీనికి తోడు ఓపెక్ ప్లస్ కూటమితో పాటు రష్యా వంటి సహకార దేశాలు ఆగస్టు నెల నుండి తమ రోజువారీ ఉత్పత్తి లక్ష్యాన్ని మరో 1,88,000 బ్యారెళ్లకు పెంచేందుకు అంగీకరించాయి.

భారత్‌కు భారీ ఊరట

అంతర్జాతీయ మార్కెట్లో ముడిచమురు ధరలు తగ్గడం, సరఫరా పెరగడం భారతదేశానికి అత్యంత సానుకూలమైన అంశం. ఎందుకంటే ప్రస్తుతం మనదేశంలోని ప్రభుత్వ రంగ చమురు మార్కెటింగ్ కంపెనీలు (OMCs) అంతర్జాతీయంగా ఉన్న భారాన్ని మోస్తూ.. దేశీయంగా తక్కువ ధరలకే పెట్రోల్, డీజిల్, కుకింగ్ గ్యాస్ సిలిండర్లను విక్రయిస్తూ భారీగా నష్టపోతున్నాయి. సౌదీ అరేబియా తీసుకున్న ఈ నిర్ణయం వల్ల మార్కెట్ సెంటిమెంట్ మెరుగుపడటమే కాకుండా, కేంద్ర ప్రభుత్వంపై పడే సబ్సిడీ భారం కూడా చాలా వరకు తగ్గుతుంది. ప్రస్తుత ఆర్థిక సంవత్సరం మొదటి త్రైమాసికంలో వచ్చిన నష్టాల వల్ల బడ్జెట్ పరిమితి దాటిపోయే ప్రమాదం ఏర్పడింది. కేంద్రం ఇప్పటికే చమురు కంపెనీలకు పన్నుల తగ్గింపు, ఇతర రాయితీల రూపంలో రూ.1.2 లక్షల కోట్ల భారాన్ని మోసింది. అయితే ఎల్పీజీ సబ్సిడీ కోసం కేటాయించిన రూ.12,000 కోట్లు వాస్తవ ఖర్చు కంటే మూడు రెట్లు తక్కువగా ఉండే అవకాశం ఉంది.

గ్లోబల్ మార్కెట్లో స్వల్పంగా పెరిగిన బ్రెంట్ క్రూడ్

సోమవారం నాడు అంతర్జాతీయ మార్కెట్లో చమురు ధరలు భారీగా పతనమైనప్పటికీ, మంగళవారం నాటి ట్రేడింగ్‌లో స్వల్ప రికవరీ కనిపించింది. గల్ఫ్ దేశాల ముడిచమురు అయిన బ్రెంట్ క్రూడ్ ధర 0.36 శాతం పెరిగి బ్యారెల్‌కు 72.26 డాలర్ల వద్ద ట్రేడవుతోంది. అలాగే అమెరికన్ డబ్ల్యూటీఐ క్రూడ్ ధర కూడా 0.44 శాతం పెరిగి బ్యారెల్‌కు 68.85 డాలర్ల వద్ద కొనసాగుతోంది. ఈ రోజు స్వల్పంగా పెరిగినప్పటికీ, ముడిచమురు ధరలు యుద్ధానికి ముందు ఉన్న సాధారణ స్థాయిలోనే ఉన్నాయి. గడచిన జూన్ నెలలో చమురు ధరలు ఏకంగా 20 శాతం వరకు పడిపోగా, జూలై నెలలో ఒకే పరిధిలో స్థిరంగా సాగుతున్నాయి. ఈ ధరల తగ్గింపు వల్ల భారతీయ పరిశ్రమలకు ఇంధన ఖర్చులు తగ్గి, తద్వారా దేశంలో ద్రవ్యోల్బణం అదుపులోకి వచ్చే అవకాశం ఉందని మార్కెట్ నిపుణులు భావిస్తున్నారు.

దేశంలో స్థిరంగానే పెట్రోల్, డీజిల్ ధరలు

అంతర్జాతీయ మార్కెట్లో ఇంతటి సంచలన మార్పులు జరుగుతున్నప్పటికీ, భారతదేశంలో పెట్రోల్, డీజిల్ రిటైల్ ధరలలో ప్రస్తుతానికి ఎలాంటి మార్పు లేదు. మే 25వ తేదీన చివరిసారిగా చమురు కంపెనీలు ఇంధన ధరలను సవరించాయి. ఆ సమయంలో ఇంధన ధరలు 7 నుంచి 8 శాతం వరకు పెరిగాయి. దేశంలోని ప్రధాన నగరాల్లో ఈరోజు (జూలై 7) నమోదైన లీటర్ పెట్రోల్, డీజిల్ ధరలు రూపాయిలలో ఇలా ఉన్నాయి.

* ఢిల్లీ: పెట్రోల్ రూ. 102.12, డీజిల్ రూ. 95.20

* ముంబై: పెట్రోల్ రూ. 111.21, డీజిల్ రూ. 97.83

* కోల్‌కతా: పెట్రోల్ రూ. 113.51, డీజిల్ రూ. 99.82

* చెన్నై: పెట్రోల్ రూ. 107.77, డీజిల్ రూ. 99.55

సెప్టెంబర్ త్రైమాసికంలో కూడా పాత స్టాక్ ప్రభావం ఉండే అవకాశం ఉన్నందున, అంతర్జాతీయంగా తగ్గిన ఈ ధరల ప్రయోజనాన్ని దేశీయ కంపెనీలు సామాన్య వినియోగదారులకు ఎప్పటి నుంచి బదిలీ చేస్తాయనేది చూడాల్సి ఉంది.