Anchor Suma: నా భర్తకు అలా జరుగుతుందని నాకు ముందే కల వచ్చింది - సుమ

Anchor Suma: ప్రముఖ యాంకర్, నటి సుమ కనకాల తన వ్యక్తిగత జీవితానికి సంబంధించిన ఓ సంచలన విషయాన్ని ఇటీవల ఓ పాడ్‌కాస్ట్‌లో పంచుకున్నారు. ఆమె భర్త, నటుడు రాజీవ్ కనకాలకు జరిగిన ప్రమాదం గురించి, దానికి సంబంధించిన తన అనుభవం గురించి ఆమె చేసిన వ్యాఖ్యలు ప్రేక్షకులను ఆశ్చర్యపరిచాయి.

కలలో చూసిన ప్రమాదం.. నిజమైంది

సుమకు అప్పుడప్పుడు వచ్చే కలలు నిజమవుతుంటాయని తెలిపారు. అలాంటి ఒక భయానక అనుభవాన్ని ఆమె గుర్తు చేసుకున్నారు. ఒకసారి రాజీవ్‌కు షూటింగ్‌లో ప్రమాదం జరిగి కాలు విరిగినట్లు తనకు స్పష్టంగా కలలో కనిపించింది. ఆ రోజుల్లో మొబైల్ ఫోన్లు లేవు. రాజీవ్ తలకోనలో షూటింగ్‌లో ఉన్నారు. ఆందోళనతో ఫోన్ చేయగా, "నిజంగానే నాకు కాలు విరిగింది. డ్రైవ్ చేస్తున్న కారు చెట్టును ఢీకొట్టింది" అని రాజీవ్ చెప్పడంతో సుమ షాక్‌కు గురయ్యారు. ఆ తర్వాత ఆమె వెంటనే వెళ్లి రాజీవ్‌ను ఆసుపత్రికి తీసుకెళ్లినట్లు ఆనాటి ఘటనను వివరించారు.

విడాకుల వదంతులపై సుమ ఫైర్

గత కొంతకాలంగా తమ విడాకుల గురించి సోషల్ మీడియాలో వస్తున్న నిరాధార వదంతులపై సుమ తీవ్ర అసహనం వ్యక్తం చేశారు:

"మా పెళ్లై 25 ఏళ్లు దాటింది. ఏ బంధంలోనైనా ఒడుదొడుకులు ఉంటాయి. మా జీవితం కూడా ఓ లాంటిదే. కెరీర్, పిల్లలు, కుటుంబ బాధ్యతలను బ్యాలెన్స్ చేసే క్రమంలో మనస్పర్థలు రావడం సహజం" అని ఆమె తమ బంధాన్ని వివరించారు. కొందరు తమ గురించి 'విడాకులు తీసుకున్నారు' అని రాస్తున్నారని, తాము కలిసి వీడియోలు పెట్టినా.. మీరు ఇంకా కలిసే ఉన్నారా? విడిపోలేదా? అంటూ కామెంట్లు పెడుతున్నారని ఆవేదన వ్యక్తం చేశారు. మొదట్లో ఈ నెగెటివ్ కామెంట్లు బాధించినా, ఇప్పుడు వాటిని పట్టించుకోవడం మానేశానని సుమ స్పష్టం చేశారు.

సుమ కెరీర్ ఆరంభంలో రాజీవ్ ఆమెకు వ్యాపార రంగంలోకి వెళ్లమని సూచించారని, కానీ పెళ్లి తర్వాత ఆయన కుటుంబానికి సినిమాపై ఉన్న మక్కువను తాను అర్థం చేసుకున్నానని కూడా ఈ సందర్భంగా పంచుకున్నారు.